चिनीयुक्त पेय पदार्थहरुमा एकदम थोरै वा कुनै पनि पौष्टिक तत्व हुँदैन भने क्यालोरी चाहिँ अधिक हुने गरेको छ जसकारण पनि यसले हाम्रो स्वास्थ्यमा नकारात्मक असर पार्ने गरेको बताइन्छ । यसबीच एक नयाँ अध्ययनले १०० प्रतिशत फलफुलको जुस भनिएका बोतलका पेय पदार्थले समेत असामयिक मृत्युको खतरा बढाउने पत्ता लगाएको छ ।
यसरी फलफुलकै भनिए पनि प्याक गरिएका जुस खानुले अकाल मृत्युको जोखिम ९ देखि ४२ प्रतिशतले बढाइदिने प्रकाशित एक जर्नल ‘जामा नेटवर्क ओपन’ मा उल्लेख गरिएको छ । अध्ययनका उपप्रमुख जिन ए.वेल्स भन्छिन् , ‘चिनीयुक्त गुलियो पेय पदार्थ चाहे त्यो सफ्ट ड्रिङ्क्स होस् वा फलफुलको जुस, सबै सिमित मात्रामा मात्र सेवन गर्नुपर्छ ।’ उनी अट्लान्टास्थित एमोरी युनिभर्सिटीकी बालविश्लेषक विभागकी असिस्टेन्ट प्रोफेसर हुन् ।
यसअघि गुलिया पेय पदार्थको सेवन कम गराउनकै लागि अमेरिकाका सातवटा शहरमा त्यस्ता उत्पादनहरुमा कर बढाइएको थियो । यसरी सोडा र चिनीयुक्त पेय पदार्थले विशेषगरी बालबालिकामा मोटोपना बढाउने र मधुमेहको जोखिम पनि वृद्धि गर्ने गरेको छ । यस्तोमा नयाँ अध्ययनले पूर्ण रुपमा फलफुलको जुस भएको र कुनै क्रितृम चिनीयुक्त पदार्थ नमिसाइएको (नो एडेड सुगर) भनेका पेय पदार्थ समेत फलदायक नहुने पत्ता लगाएको हो । यसअघिका अनुसन्धानले पनि सफ्ट ड्रिङ्क र जुस मुटु सम्बन्धी रोगसँग सम्बन्धित रहेको देखाएको थियो । वेल्सका अनुसार मोटोपना, मधुमेह र रगतमा बोसोजन्य पदार्थ वृद्धि हुनु अत्याधिक चिनी सेवन गर्नुसँग सम्बन्धित छन् ।
यसकारण पनि यिनमा हुने कृत्रिम चिनीको बढी खपतले मृत्यु दरको जोखिमलाई प्रभावित गर्न सक्ने बताइएको हो ।
यो विषयमा प्रकाश पार्न उनी र उनका सहकर्मीहरुले १३ हजार भन्दा धेरै मानिसहरुमा अध्ययन गरेका हुन् । जसमा दैनिक १० प्रतिशत वा सो भन्दा बढी क्यालोरीका चिनीयुक्त पेय पदार्थ सेवन गर्ने मानिसमा मुटु सम्बन्धी रोगका कारण मृत्यु हुने जोखिम ४४ प्रतिशत रहेको र ५ प्रतिशत भन्दा कम पेय पदार्थ सेवन गर्नेको तुलनामा अन्य स्वास्थ्य समस्याका कारण चाँडै मृत्यु हुने खतरा पनि १४ प्रतिशत रहेको पाइएको हो ।
यसरी प्रत्येक दिन १२ आउन्स ( ०.३५ लिटर) अतिरिक्त फ्रुट जुस पिउने गर्नुले कुनैपनि कारणवश् मृत्यु हुने जोखिम २४ प्रतिशतले उच्च बनाइदिने भनिएको छ । वेल्स भन्छिन्, ‘चिनीयुक्त गुलियो पेय पदार्थ र जुस सम्बन्धी हाम्रो निष्कर्षलाई स्वतन्त्र रुपमा हेर्दा सबैले स्पष्ट हुनुपर्छ कि उल्लेखित जोखिम न्युनतम उपभोग गर्नेलाई पनि लागू हुन्छ ।’
तर पनि उनलाई यो खोजले कुनै आश्चर्य नगराएको बताएकी छन् । किनकी यसअघिका अनुसन्धानमा पनि गुलिया पेय पदार्थले इन्सुलिन प्रतिरोध बढाउने गरेको देखाएको छ जसले मुटु सम्बनधी रोगको खतरा बढाउने गर्दछ । त्यस्तै फ्रुक्टोज उपभोगले भने हर्मोनहरुलाई कम्मर वरपर तौल बढाउन सक्रिय पार्छ जसलाई पनि मुटु सम्बन्धी रोग निम्त्याउने अर्को जोखिमदायक पक्ष मानिन्छ ।
१०० प्रतिशत फलफुलको जुस लगायत सम्पूर्ण गुलिया पेय पदार्थ र अल्पकालीन मृत्युबीचको सम्बन्ध अध्ययन गरिएको यो पहिलो अनुसन्धान भएको वैज्ञानिक मार्टा गुआस फिर र डाक्टर फ्रान्क बी.हु बताउँछन् । मार्टा हाभर्डमा न्युट्रिसन विभागकी रिसर्च सायन्टिस्ट हुन् भने डाक्टर फ्रान्क पनि हाभर्डको औषधि विभागका प्रोफेसर हुन् । यसरी फलफुलका जुस अन्य ड्रिङ्कको तुलनामा राम्रो मानिएपनि बालबालिका र तौल नियन्त्रण गर्न चाहने व्यक्तिहरुले यसको सेवन सिमित रुपमा गर्नुपर्ने बताइएको छ । अमेरिकी एकेडेमी अफ पेडियाट्रिक्स र डाएटरीको सुझाव अनुसार १ देखि ६ वर्षका बालबालिकाले दिनमा ५.२ मिलि–लिटर जुस मात्र सेवन गर्नुपर्छ । तर केही फलफुलमा हुने भिटमित र मिनरल लगायत गुणकारी तत्वले फाइदा पनि गराउन सक्ने हुँदा यो विषयमा थप अनुसन्धान आवश्यक रहेको गुआस बताउँछन् । सिएनएनबाट
तपाइँको प्रतिक्रीया