अवरुद्ध भएको १८ घण्टापछि पृथ्वी राजमार्ग एकतर्फी खुल्यो

काठमाण्डौ :  सडक भासिए पछि अवरुद्ध भएको पृथ्वी राजमार्ग एकतर्फी खुलेको छ । १८ घण्टादेखि ठप्प भएको राजमार्ग बिहान १० बजेदेखि खुलेको हो ।

दुईतर्फी नै सडक खुलाउने प्रयास भइरहेको जिल्ला प्रहरी कार्यालय धादिङका प्रहरी नायब उपरीक्षक सन्तुलालप्रसाद जैसवारले जानकारी दिनुभयो । हिजो दिउँसो ४ बजे धादिङको धार्केमा गणेश खोला पुल नजिकै सडक भासिएपछि पृथ्वी राजमार्ग ठप्प भएको थियो ।

जैसवारका अनुसार भासिएको भागमा माटोले पुरेर र पर्खाल लगाएर एकतर्फी सडक खुलाइएको हो । साँघुरो ठाउँका कारण सडक मर्मतमा ढिलाइ भएको थियोे । सेना र सडक विभागका कर्मचारीलगायतको टोली सडक खुलाउन खटिएका छन् ।